Туркистон шаҳрида вилоят ҳуқуқ-тартибот ва хавфсизликни таъминловчи органларининг янги бинолари қад ростлайди. Маъмурий-тадбиркорлик марказида жойлашган давлат идоралари барча замонавий талабларга мувофиқ қурилмоқда.
Вилоят ҳокими Ўмирзақ Шўкеев қурилиш майдонларида бўлиб, иш натижалари билан танишди. Давлат даромадлари департаменти биноси яқин кунларда фойдаланишга топширилади.
Туркистон шаҳридаги Фавқулодда вазиятлар департаменти ва «Ёнғинни ўчириш-қутқарув хизмати» давлат идораси учун маъмурий бино ва 4та автотранспорт бекати қурилиши жадаллик билан амалга оширилмоқда. Иншоот сентябрь ойида  фойдаланишга топширилади.
Май ойида бошланган  вилоят прокуратураси биноси келаси йили битади. У умумий майдони 10 минг кв. метр бўлиб, етти қаватдан иборат. Айни пайтда техник ва бетон қуйиш ишлари юритилмоқда.
Вилоят ҳокими Миллий хавфсизлик қўмитаси биносида бўлиб, у ердаги ишлар билан танишди. Ушбу иншоот йил охиригача фойдаланишга берилади.
 Полиция департаментининг «Тезкор бошқарув маркази» биноси қурилиши ўтган йили сентябрь ойида бошланган эди. Бугунги кунда 3 га ерда қурилиш-монтаж  ишлари жадаллик билан амалга оширилмоқда.
Шунингдек, Туркистон шаҳрида вилоят Полиция департаменти биноси ҳам қад ростламоқда. У бир нечта блокдан иборат бўлиб, унда муваққат ҳибсхона, спорт майдони, 30та автомашинага мўлжалланган гараж мавжуд. Полиция ходимлари янги бинога янги йилда кўчади.