Туркистон шаҳрига кираверишда “Туркистон” деган ёзуви бор ўзгача ёдгорлик қад ростламоқда. Баландлиги 11 метр, умумий майдони 28 метрга тенг стелага 70 дона чироқлар ўрнатилади. Янги иншоотнинг қурилиши яқин кунларда ниҳоясига етади.
Вилоят ҳокими Ўмирзақ Шўкеев вилоят марказидаги қурилиш майдонларига бориб, қизғин суръатда олиб борилаётган ишлар билан танишди.  У Туркистон шаҳрининг ҳаммабоп “ЭКО бозор” ва автовокзал қурилиши айланасини ободонлаштириш ишлари билан танишди. Бино атрофида ободонлаштириш ва кўкаламзорлаштириш тадбирлари олиб борилмоқда. Яшил ҳудудга 5 минг дарахт кўчати ўтқазилади, чироқлар ўрнатилади, суғориш тизими ишга қўшилади.
“ЭКО бозор”да  улгуржи савдо учун 450 ўринга мўлжалланган омбор, қўшимча савдо учун 3500-4000 ўринга мослаб дўконлар қурилмоқда. Бугунги куни бозор ҳудудидан жой олишга тадбиркорлар жалб қилиниб, йирик ишлаб чиқарувчи ташкилотлар билан келишувлар олиб борилмоқда. Мамлакат тадбиркорлари билан бирга, янги бозорда хориж тадбиркорлари ҳам ўз маҳсулотларини савдога чиқаради.
Вилоят ҳокими қурилиши авжида Яссавий кўчасини тўла таъмирлаш ишлари ва “Туркистон – арена” ўйингоҳи атрофини кўкаламзорлаштириш ишларига гувоҳ бўлди. Масъул ходимларга қатор топшириқлар берди.