Алоҳида эътибор ва ғамхўрликка муҳтож фуқароларни ижтимоий ҳимоялашнинг самарали тизимини шакллантириш ҳануз долзарблигича қолмоқда.

Яқинда Nur Otan партиясининг “Тўсиқсиз келажак” лойиҳаси доирасида Қозоғистоннинг турли минтақаларида яшовчи алоҳида ғамхўрликка муҳтож шахслар, вилоят маслаҳати депутатлари, давлат органлари ҳамда жамоат ташкилотлари вакилларидан иборат гуруҳ таркибида Туркистон шаҳрига ташриф буюрдик. 

Учрашувда вилоят марказидаги маданият ва таълим масканлари фаолияти билан танишдик ҳамда кун тартибидаги долзарб масалаларни муҳокама қилдик. Шу куни алоҳида ғамхўрликка муҳтож фуқаролар қалбига қулоқ солиб, уларнинг таклиф ва фикрларини тингладик. Мулоқотдан сўнг мезбонларга совға-саломлар тортиқ қилинди. Асосий мақсад – уларнинг ижтимоий ҳаётдаги иштирокини таъминлашдир.

Статистика маълумотларига кўра, Қозоғистонда яшовчи имконияти чекланган шахслар сони 695 мингни ташкил қилади. Уларнинг 60 фоизи (419,8 минг) меҳнатга қобилиятли ёшдагилардир.

Бу борада жамият фикрини тубдан ўзгартиришимиз, шаклланган қолипларни йўқотишимиз жоиз. Бу тоифадаги фуқароларнинг ҳуқуқларини ҳимоялашга барча манфаатдор шахслар жалб қилиниши, бинобарин, бу йўналишда бирлашиб ҳаракат этмоғимиз муҳимдир.