Жорий йилнинг 9, 10 октябрь кунлари Туркистон мусиқали-драма театрининг навбатдаги мавсуми таниқли драматург, ҚР Давлат мукофоти лауреати Дулат Исабековнинг пьесаси асосида саҳналаштирилган “Бөрте” спектакли билан очилади. Буни театр директори ва бадиий раҳбари Айнур Кўпбасарова маълум қилди.
Унинг таъкидлашича, янги театрнинг дастлабки саҳна асари режиссёри – италиялик Карло Шаккалуга. Ролларда Қозоғистон халқ артисти Алмахан Кенжебекова, ҚРда хизмат кўрсатган артист Лейло Бекназар-Ханинга, ҚРда хизмат кўрсатган Алихан Идришева, Еркебулан Дайиров, Ақбўта Қаймақбаева, Нуркен Ўтеуилов, Айя Шарип сингари касбий актёрлар ўйнаган.
– Бўрте хонимга бағишланган асар қозоқ саҳнасида илк бор қўйилмоқда. У 10-11 ёшдаги Темучин ва Бўртенинг танишувидан бошланиб, Чингизхон буюк империяни бошқариб турган даврни ўз ичига олади. Чингизхоннинг ҳарбий юриши Хитойдан бошланиб, Украинада давом этади. Спектаклда гўзал, ақлли ва бир сўзли аёл – Бўрте хонимнинг ҳаёти баён этилади, – деди Айнур Кўпбасарова.
Тарихий спектаклнинг илмий маслаҳатчиси – тарих фанлари номзоди, доцент Нурлан Атиғаев.
Асарда декорациянинг ҳаётийлиги, либосларнинг даврга мослиги, рассомнинг маҳорати томошабинни ўзига ром этади. Таниқли бастакор Хамит Шангғалиевнинг айнан ушбу саҳна асари учун ёзган мусиқасида давр руҳи уфуриб туради.