Қозоғистонлик фазогир, “Қазақстан ғарыш сапары” ҳиссадорлик жамияти бошқаруви раиси Айдин Айимбетов Туркистонга келди. Космонавтика соҳасига масъул раҳбар билан вилоят ҳокими ўринбосари Улан Тажибаев учрашиб, муҳим масалаларни муҳокама қилди. Хусусан, Туркистон вилоятининг иқтисодиётини юксалтиришда космик технологияларни татбиқ қилиш имкониятлари сараланди.
Қозоқ фазогири Айдин Айимбетов ҳозирги кунда мамлакатлар тараққиётига космик соҳасининг таъсири кучли эканлигига тўхталиб, имкониятлардан самарали фойдаланиш зарурлигини айтди. Вилоят ҳокимининг ўринбосари У. Тажибаев минтақани ривожлантиришда илмий ютуқлардан унумли фойдаланиш долзарб масалага айланганини таъкидлади.
Учрашувда “Қазақстан ғарыш сапары” ҳиссадорлик жамияти ва Туркистон вилоят ҳокимлиги ўртасида меморандум имзоланди. “Қазақстан ғарыш сапары” ҳиссадорлик жамияти ва Туркистон вилоят ҳокимлиги Вазият марказининг ҳамкорликдаги лойиҳалари учун махсус ахборий гуруҳ тузиладиган бўлди. Унга фавқулодда вазиятлар, қишлоқ хўжалиги соҳасининг вакиллари жалб қилинади. Космик мониторинг минтақадаги ерларнинг мақсадга мувофиқ фойдаланишини назорат қилади. Бундан ташқари, қатор бошқарма ва департамент мутахассислари космик мониторинг қилиш ва минтақага фойдали қарорларни таҳлил қилиш учун махсус тайёргарликдан ўтади. Уларни “Қазақстан ғарыш сапары” ҳиссадорлик жамиятининг мутахассислари ўқитиб, маслаҳат беради. Келишувларга мувофиқ, “Қазақстан ғарыш сапары” ҳиссадорлик жамияти ва Туркистон вилоят ҳокимлиги ўртасидаги ҳамкорликни мустаҳкамлаш мақсадида, йилнинг охиригача режаларни амалга ошириш юзасидан Йўл харитаси тайёрланади.