Туркистон вилоятида 200дан зиёд ёш спортчи очиқ осмон остида анъанавий ўйинлар мусобақасида иштирок этди. Тўлебий туманида  ҚР Мустақиллигининг 30 йиллигига бағишлаб ўтказилган беллашувда 14 ва 29 ёш оралиғидаги ёшлар миллий спортни ошиқ отиш,  от устида камондан ўқ узиш, қозоқча кураш, қўчқор кўтариш, тўғизқумалоқ ва арқон тортиш турларидан омадларини синашди.
Тўлебий тумани «Ёшлар имконият маркази»нинг ташаббуси билан Элбоши Н. А. Назарбаевнинг «Буюк даштнинг етти қирраси» мақоласини ёшлар орасида тарғиб қилиш, ёшларни қозоқ халқининг миллий ўйинларига қизиқтириш мақсадида Туркистон вилоятининг туман, шаҳар ёшлари орасида «Кўчманчилар ўйини» вилоят мусобақаси уюштирилди. Ўтовларда махсус ёзилган дастурхонга бувилар кенгашининг таомномаси қўйилган. Меҳмонларга қозоқ халқининг миллий таомлари тортилиб, уни тайёрлаш усуллари тушунтирилди.
Қизғин  мусобақаларда жамоавий ҳисобда омад кулиб боққан, 500 минг тенге пул мукофотга эга бўлган Тўлебий туманига Туркистон вилояти ҳокимининг ўринбосари Сакен Қалқаманов медаль, кубок топширди. Спортнинг алоҳида турлари бўйича ғолиб бўлганларни Қазиғурт тумани ҳокими Арман Абдуллаев, Ўрдабоши тумани ҳокими Бағлан Батиршаев, Тўлебий тумани ҳокими Тўлеген Телғараевлар табриклаб, пул мукофотлари ва қимматбаҳо совғалар топширишди. Келгусида «Кўчманчилар ўйини» анъанавий турда ўтказилади.