Туркистон вилояти, Саврон туманида миллий спорт турларидан мусобақалар уюштирилди. “Салом сенга, Туркистон!” мавзуидаги фестиваль доирасида ўтган мусобақаларда Саврон, Ўтрор туманлари ва Туркистон, Кентов шаҳарлари жамоалари иштирок этишди. 

Мусобақанинг очилиш маросимида вилоят ҳокимининг ўринбосари Сакен Қалқаманов миллий спорт тури ихлосмандларини қутлаб, вилоятимизда миллий спорт ривожланиб келаётганини ва йирик спорт мусобақалари ўтказилаётганини алоҳида таъкидлади. 

Тарихий Саврон шаҳарчаси ёнида ўтган фестивалда кўпкари, танга илиш, қиз қувиш, от устида камондан ўқ узиш  ва ланка тепиш бўйича беллашувлар ўтди. Бундан ташқари, қушбегилар ва този ит боқувчилар ўз маҳоратини намойиш этишди. 

Вилоят ҳокимлиги, жисмоний тарбия ва спорт бошқармаси, Ўтрор ва Саврон туманларининг ҳокимликлари юксак даражада ўтган маданият ва санъат фестивалининг ташаббускорлари бўлишди. 

Сайёҳлик ривожланиб келаётган Туркистонда хорижлик сайёҳлар тарихий обидалар, ёдгорликлардан ташқари миллий ўйинларимизга ҳам катта қизиқиш билдиришмоқда. Шунинг учун ҳам бу каби мусобақалар тез-тез уюштирилиб турилиши мақсадга мувофиқ бўлади.