Туркистон шаҳрида кўкаламзорлаштириш ва ободонлаштириш ишлари қизғин давом этмоқда.

Шу мақсадда шаҳар 32 секторга бўлинган. Уларнинг ҳар бири учун туман, шаҳар ҳокимлари, бошқарма раҳбарлари масъул. Барча тармоқларда иш суръати етарли даражада юқори бўлиши керак, чунки улар шаҳарни ободонлаштиришга улкан ҳисса қўшмоқда. Шу масалага тўхталган вилоят ҳокими Ўмирзақ Шўкеев шаҳарни ободонлаштириш ва  кўкаламзорлаштириш режасининг ижросини муҳокама қилди. 

Минтақа раҳбари Тулкибош, Ўрдабоши, Ўтрор, Сайрам туманлари ва Арис шаҳри ҳокимлигига қарашли шўъбаларни, шунингдек, қурилиш бошқармасига тегишли ҳудудни оралаб кўрди. Ишни тўғри йўлга қўйган шўъба масъулларига миннатдорчилик билдирди. Кўзбўямачиликка йўл қўйган, ишни шунчаки ҳисобот учун бажариш оқибати хайрли бўлмаслигини таъкидлаб, сидқидилдан ишлашга чақирди. 

Айниқса, кўчатларни суғориш тизимини ниҳоясига етказиш, ниҳолларни шамолдан асраш мақсадида уларни симтўрлар билан ўраш зарурлигини таъкидлади. Қайрағоч ва мажнунтолларни кўпайтириб, ҳудуд тупроғи ва маҳаллий иқлимига мос дарахтларни ўстиришга эътибор қаратишни топширди. 

Иншоотларни кўздан кечириш жараёнида замонавий  қурилиш ишларини олиб боришда янги технологиялардан фойдаланиш  масаласи ҳам муҳокама қилинди.