Туркистон шаҳрида Қозоғистон Республикаси Мустақиллигининг 30 йиллигига бағишлаб вилоят маданият бошқармаси ташкилотчилигида “Туркистон овози” эстрада қўшиқлари танлови ўтди. Икки кун давом этган санъат фестивалида мамлакатимизнинг турли бурчакларидан 18дан 35 ёшгача бўлган 17 нафар хонанда иштирок этди.

Ижодкор, қобилиятли ёшларни аниқлаб, уларни қўллаб-қувватлаш мақсадида ўтказилган танлов янги  истеъдодларни кашф этди.

Танловга бастакор, ҚР Давлат мукофоти лауреати Тўлеген Мухамеджанов, ҚРда хизмат кўрсатган арбоб, халқаро қўшиқлар танлови совриндори Маржан Арапбаева, “Маданият соҳаси аълочиси”, бастакор, продюсер Қайрат Баекенов, бастакор Хамит Шанғалиев, халқаро “Славян бозори” фестивали совриндори Рухия Байдукенова, эстрада юлдузлари Айдар Турғанбек ва Жанар Дуғаловалар ҳакамлик қилишди. Шунингдек, жаҳонга машҳур опера хонандаси  Нуржамал Усенбаева меҳмон сифатида қатнашди.

Танловнинг якуний қисмида Туркистон вилояти ҳокими Ўмирзақ Шўкеев ва Жамбил вилояти ҳокими Бердибек Сапарбаевлар ҳам иштирок этишди. Катта концерт юксак савияда ўтди.

Танлов натижасига кўра, бош совринга туркистонлик Айзада Алимбек сазовор бўлди. Биринчи ўрин жамбиллик Қимбат Жамбилбекка насиб қилса, иккинчи ўринни манғистовлик Айдин Жумабаев қўлга киритди. Қайрат Сарибаев (Алмати вилояти), Акимхан Маженов (Қўстанай) ва Айнур Назарбекова (Шимкент) учинчи ўрин билан қаноатланди. Ғолиб ва совриндорларга диплом ва қимматбаҳо совғалар топширилди.