Тадбиркор-ҳомий, давлат ва жамоат арбоби Бўлат Ўтемуратовнинг шахсий жамғармаси мақтааралликларга 10та уй ҳадя қилди. Бу ҳақда туман ҳокими Бақит Асанов маълум қилиб, бошпанали бўлган оилаларга уй калитларини топширди.

Мирзакентнинг янги кичик туманида қад ростлаган уйларда етим ва ота-она ғамхўрлигисиз қолган болалар, серфарзанд оилалар, муҳтож кишилар қўним топди. 

Ўтган йили Мақтаарал туманида сув тошқини туфайли уйларидан ажраган фуқароларга Б. Ўтемуратов жамғармаси ёрдам қўлини чўзган ва 6 млн. АҚШ долларига 150 оилага уй қуриб берган эди.

Муқаддам янги кичик тумандаги 16та уй  ижара асосида уй олиш учун навбатда турган фуқароларга берилган эди. Бундан ташқари, “Нурли ер” давлат дастури доирасида 2020-2025 йилларга мўлжаллаб, республика бюджетидан 417,9 млн. тенге ажратилди ва 50та уй кўп болали, кам таъминланган ва навбатда турган оилаларга берилди.

Жорий йилда эса 76 мақтаараллик  оила  давлат дастурлари ва шахсий жамғармалар ҳисобидан бошпанали бўлишди.

Шуни таъкидлаш жоизки, туман ҳокими Б. Асановнинг ташаббуси билан Мирзакентда 1,8 млрд. тенгега 3-қаватли 36та квартиранинг қурилишига оид лойиҳа-смета ҳужжатлари ишлаб чиқилди.