Тўлебий тумани тадбиркорлари ва аҳолиси ақбастаулик кўп болали, бева аёлга уй қуриб берди. Қиймати 12 миллион тенгелик уй 120 квадрат метрни ташкил қилади. Саккиз болали онанинг аҳволи билан танишган туман “Ёшлар имконият маркази” вакиллари қурилиш ишларини уюштириб, ҳомийлар топди, умуман олганда, эзгу ишнинг бош-қошида бўлишди.
Кўп болали онани бошпана билан табриклашга борган туман ҳокими Тўлеген Телғараев ҳомийларга миннатдорчилик билдирди.
– Ушбу ишлар Элбошимиз Нурсултан Назарбаевнинг “Келажакка йўлланма: маънавий янгиланиш” дастуридаги вазифаларни амалга ошириш мақсадида ҳамда фуқаролар онггида ватанпарварлик ҳиссини кучайтириш, ижтимоий фаолликни ошириш мақсадида уюштирилмоқда. Мамлакатимизда сахийқалб одамлар кўпаяверсин, – дея туман раҳбари янги уй эгаларига газ плитасини совға қилди.
Ёшларнинг эзгу ташаббусини қўллаб-қувватлаган туман фахрийлар кенгаши раиси Атирхан Шинғисбаев оқ фотиҳасини берди. Янги бошпанага эга бўлган Мадина Набиева ҳомийларга миннатдорчилик билдирди. У шу пайтгача хароба уйда яшаганди.