Туркистон шаҳрига вилоят мақоми берилгач, минтақа раҳбарининг топшириғи билан ободонлаштириш ва кўкаламзорлаштириш учун ҳар бир туманга алоҳида майдон бириктириб берилган эди.
Куни кеча Сайрам тумани ҳокими Уласбек Садибеков Туркистон шаҳрини ободонлаштириш мақсадида Сайрам туманига бириктирилган 2-шўъба ҳудудини кўздан кечирди. Майкотов кўчасидаги мактаб олдига экилган 250 туп игнабаргли дарахтлар, 1020 кв.м. майдондаги майсазор ва Ўртоқ-4 кўчасига ўтқазилган 250 туп арча, қарағайлар, Ипак йўли кўчаси бўйлаб экилган 1350 хил садақайрағоч дарахтларининг аянчли аҳволда эканини кўрди.
Иш аҳоли томонидан қўллаб-қувватланса-да, кўчатларни парваришлашга тайёр кўнгиллилар оз. Баъзи дарахтлар синган ва қирқиб ташланган. Хусусан, Ўртоқ-4 кўчаси бўйлаб ўрнатилган суғориш тизими ташқарига чиқариб ташланган, мактаб олдига экилган игнабаргли дарахтлар эса илдизи билан суғуриб олинган.
Одамлар ҳам ён-атрофи, маҳалласида экилган ниҳолларга эътиборли бўлиб, парваришлаб турса, қанчадан-қанча дарахтларни сақлаб қолган бўламиз. Яъни, “бу давлатники, менга нима”, деган қарашдан воз кечиш лозим. Керак бўлса, дарахтпарвар инсонларни рағбатлантириш керак.