Туркистон шаҳридаги “Буюк Дашт эли” марказида “Қозоғистон халқи Ассамблеяси қошидаги ташкилотлар: этнослараро низоларнинг олдини олиш дастаклари” мавзуида анжуман ўтди. Тадбирни вилоят ижтимоий тараққиёт бошқармаси раҳбарининг ўринбосари, вилоят ҚХА котибияти мудири Даурен Сариев очиб, олиб борди.
Анжуманда Туркистон вилоят, туман ва шаҳарлардаги Қозоғистон халқи Ассамблеяси ташкилотлари ва этномаданият бирлашмалари етакчилари ва аъзолари, оммавий ахборот воситалари ва ёшлар ташкилотлари вакиллари, ижтимоий тараққиёт бошқармаси ва “Жамоат тотувлиги” корхонаси раҳбарлари ва ходимлари иштирок этишди.
Учрашувда сўз олган Д. Сариев минтақада этнослараро тотувлик, бирликни сақлашнинг аҳамиятига тўхталди.
– Этнослар орасида низоларга йўл бермаслик барчамизга катта масъулият юклайди. Барқарорлик бўлмаган жойда тараққиёт бўлмайди. Бу йўналишда Қозоғистон халқи Ассамблеяси ташкилотлари, унинг аъзолари зиммасига юксак масъулият юкланган. Биз ҳамкорликда халқимизнинг тотувлик ва бирлиги, жамоат хавфсизлиги ва тинчлигини таъминлай оламиз. Табаррук Туркистон заминида барқарорликни сақлаш, ёшларни ватанпарварлик руҳида тарбиялаш, давлат тилини ўзлаштириш, бошқа маданият ва анъана вакиллари билан ўзаро тотувликда ҳаракат қилишни шакллантиришда сизнинг қўлловингиз муҳим аҳамиятга эга, – деди у.
Анжуманда Жанубий Қозоғистон давлат педагогика университетининг “Маънавий янгиланиш ва тарбия” бўлими раҳбари Қайрат Анарбаев “Миллатлараро тотувлик асоси – “Маънавий янгиланиш” мавзуидаги фикрларини илгари сурди.
– Давлат мустақиллиги – ҳар биримиз учун қадрли. Бирлик ва ҳамжиҳатлик – мамлакатимизнинг энг катта бойлиги. Элбошимиз таъкидлаганидек, оила ва урф-одат, анъаналар – жамият хазинаси, илм-фан ва меҳнат – фаровон ҳаёт калитидир, – деди Қ. Анарбаев.
Анжуманда, шунингдек,
Х. А. Яссавий номидаги халқаро қозоқ-турк университетининг “Ҳуқуқшунослик” кафедраси мудири Асқат Есеналиев “Қозоғистон халқи Ассамблеяси – этнослараро бирлик платформаси” мавзуида маъруза қилиб, этнослараро муносабатларни яхшилаш юзасидан фикрларини илгари сурди.
Анжуман якунида иштирокчиларга махсус сертификатлар топширилди.