Туркистонда ҚР Тўнғич Президенти – Элбоши кунига бағишлаб, “Элбоши – элимнинг таянчи” тадбири ўтиб, унда “Элбоши ва Буюк дашт мероси” номли кўргазма намойиш этилди.
Унда Тўнғич Президентнинг меҳнат фаолияти, Туркистондаги хизмат сафарлари, хорижлик раҳбарлар билан бўлган учрашувларда тушган суратлари тақдим этилган.
“Фараб” кутубхонасида ўтган тантанада LED экран орқали Элбоши Н. Назарбаевнинг “Мамлакатнинг етти устуни” номли тамойили ҳақида ҳужжатли фильм намойиш этилди.
Туркистон вилояти ҳокимининг ўринбосари Раишид Аюпов йиғилганларни байрам билан табриклади.
Сўнг бир гуруҳ фаолларни вилоят ҳокимининг Ташаккурномалари билан тақдирлади. Улар орасида тиббиёт, давлат хизмати, ҳуқуқ-тартибот, спорт, тадбиркорлик ва бошқа соҳа вакиллари бор.
Тантанада вилоят оқсоқоллар кенгаши раиси Жарилқасин Азиретбергенов ҳам барчани қутлаб, Элбошининг давлат мустақиллигига қўшган ҳиссасини таъкидлади.
Кентов шаҳридаги 13-сонли Ю. Гагарин номидаги мактабнинг инглиз тили муаллимаси Елена Стребкова қутлуғ сана аҳамиятига тўхталиб, давлат тили мамлакатни бирлаштирувчи куч эканини таъкидлади.
Тадбирда вилоятнинг таниқли санъаткорлари ва санъат жамоалари концерт дастурини намойиш этиб, ватанпарварлик руҳидаги куй-қўшиқлар янгради.