ҚР Президенти Қасим-Жўмарт Тўқаев раислигида ваколатли органлар раҳбарларининг йиғилиши бўлиб ўтди.
Йиғилишда Бош прокуратура, Миллий хавфсизлик қўмитаси, Мудофаа ва Ички ишлар вазирликларининг биринчи раҳбарлари, шунингдек, Президент Маъмурияти ҳамда Хавфсизлик Кенгаши Девони раҳбарлари иштирок этди.
ҚР Президентига январь ойининг биринчи ўн кунлигида мамлакатнинг қатор ҳудудларида содир бўлган воқеалар юзасидан судгача терговнинг бориши, шунингдек, ўтказилган махсус операциялар якунлари ҳамда мамлакатда жамоат хавфсизлиги ва қонунийликни таъминлашга қаратилган чора-тадбирлар тўғрисида маълумот берилди.
Учрашув якунида Қасим-Жўмарт Тўқаев қатор аниқ топшириқлар берди. Қозоғистонда, шу жумладан, Алмати шаҳрида содир бўлган фожиали воқеаларни ҳар томонлама ўрганиш, ҳалок бўлган тинч аҳолининг аниқ сонини аниқлаш, оғир пайтларда кучишлатар тузилмалари ҳаракатларини мувофиқлаштиришнинг янги меъёрий-ҳуқуқий базасини ишлаб чиқишга алоҳида эътибор қаратилди.
Қасим-Жўмарт Тўқаев Хавфсизлик Кенгаши котибига Махсус операциялар кучларини шакллантиришни жадаллаштириш ва миллий хавфсизлик тизимини қайта қуриш юзасидан аниқ таклиф киритиш борасида топшириқ берди.
Давлат раҳбари аксилтеррор операциялари ва тергов ҳаракатлари давомида фуқаролар ҳуқуқлари бузилишининг олдини олиш муҳимлигини таъкидлади.