Вилоятимизда тиббиёт муассасаларининг сони ошиб бормоқда. Уларнинг қаторига яна иккита муассаса қўшилди. Бу “Соғлом юрт – соғлом авлод” дастурида белгиланган вазифаларни амалга оширишга ҳисса қўшиши аниқ.
Туркистон вилояти ҳокими Ўмирзақ Шўкеев дастлаб “DOCTOR D” стоматология марказига ташриф буюрди.
Жамоат саломатлиги бошқармаси тасарруфидаги стоматология маркази замонавий ускуналар билан жиҳозланган. Бу ерда тишларнинг 3D компьютер томографияси, жарроҳлик, терапия, ортопедия хоналари ва болалар стоматологияси мавжуд. Хорижий мамлакатларда малака оширган тажрибали шифокорлар беморларга сифатли тиббий хизмат кўрсатади.
– Янги тиббиёт муассасалари сифатли хизмат кўрсатиб, соғликни сақлаш соҳаси равнақига муносиб ҳисса қўшишига ишонаман. Туркистон шаҳрида тез тиббий ёрдам станцияси қурилди, яқинда 570 ўринли халқаро даражадаги шифохона ва “Она ва бола” маркази фойдаланишга топширилади, – деди шифокорлар билан суҳбатлашган Ўмирзақ Естайули.
Шу куни вилоят раҳбари янги қурилган 200 ўринли шаҳар марказий шифохонасига ҳам ташриф буюрди. Республика ва вилоят бюджети маблағига барпо этилган муассасанинг умумий майдони 8200 метр квадратни ташкил қилади. Шифохона барча зарур жиҳоз ва ускуналар билан таъминланган.
Янги иншоотларнинг очилиш маросимида сўзга чиққан вилоят ҳокими Ў. Шўкеев тиббиёт соҳасига эътибор асло сусаймаслигини таъкидлади.