Туркистон вилоятида 685та маданият ва санъат муассасаси аҳолига хизмат кўрсатмоқда. Ўтган йили клуб муассасаларида 11 338та, кутубхоналарда 15 739та, музейларда 614та оммавий тадбир уюштирилди. Бу ҳақда вилоят Маданият бошқармаси раҳбари Азимхан Қўйлибаев маълум қилди.
– Туркистон шаҳридаги этноовулда “Наврўз Фест” байрами уюштирилиб, Туркистоннинг маданий ёдгорликлари рамзига айланган Тойқозонда 2 тонна наврўз кўжа тайёрланди . Бундан ташқари, Туркистон вилоятининг 3 йиллиги муносабати билан “Гуллаб, яшнаган – Туркистон” оқинлар айтишуви, “Turkistan Jazz Party I” халқаро фестивали, “Тойқозон” миллий либос дизайнерлари республика танлови, “Туркистон овози” республика ёш эстрада хонандалари танлови, “Қозоқ романсиадаси” халқаро романс ижрочилари танлови ташкил этилди. Қозоқ қўшиқларини тарғиб қилиш мақсадида 14 давлатдан келган хонандалар иштирокида “Voice of Turan” қўшиқ фестивали ўтказилди, – деди Азимхан Серикули.
Шунингдек, “Турксой” ташкилоти шафелигида Туркистон шаҳрида туркий давлатлар рассомларининг “Туркистоним – Туроним” халқаро симпозиуми ўтди. Унда 6та туркийзабон давлатдан 29 нафар рассом иштирок этиб, минтақа тарихига оид 120та расм чизилди. Шунингдек, Мустақилликнинг 30 йиллигига бағишланган “Парақ Times” китоб ярмаркаси, энг кўп китоб ўқийдиган китобхонлар ўртасида “Бир мактаб – бир китоб” республика танлови, “Маънавият карвони – Туркистонда” тадбирлари ташкил этилди.