Туркистонда туркий давлатлар муфтийлари иштирокида «Ислом тамаддуни тараққиётига туркий халқларнинг қўшган ҳиссаси» мавзуида халқаро илмий-амалий анжуман ўтди.
Йиғилишда Туркия Республикаси Дин ишлари бошқармаси раҳбари, Бош муфтий Али Ербаш, Кавказ, Қирғизистон ва Ўзбекистон мусулмонлари диний идоралари раҳбарлари иштирок этди.
Анжуманда туркий оламнинг муштарак мероси Қўрқит ота, Яссавий, Навоий, Манас мероси, Мотуридий таълими ва Абу Ҳанифа мазҳабини тарғиб қилиш масалалари муҳокама қилинди.
Диний байрамларни бир кунда нишонлаш ва деструктив диний оқимлар салбий тарғиботининг олдини олиш масалаларига эътибор қаратилди.
Анжуман аввалида Қозоғистон Президенти Қ. Тўқаевнинг тадбир иштирокчиларига йўллаган табрик мактуби матнини ҚР Ахборот ва ижтимоий тараққиёт вазири Асқар Ўмаров ўқиб эшиттирди.
«Озарбайжон, Қирғизистон, Ўзбекистон ва Туркия бош муфтийларига ва муҳтарам меҳмонларга ўз миннатдорчилигимни билдираман. Ота-боболаримиздан мерос қолган ислом дини эзгулик, одоб-ахлоқ каби олижаноб фазилатларни тарғиб қилади. Шунингдек, тинчлик, барқарорлик ва фаровонликни мустаҳкамлашга чақиради. Шу муносабат билан анжуманда иштирок этаётган дин арбоблари жаҳон ҳамжамиятини эзгу ишларга сафарбар этишга катта ҳисса қўшади, деган умиддаман. Бугунги учрашув тарихи муштарак бўлган мамлакатларимизнинг маънавий-маърифий ишларига янги суръат бағишлаши, эзгу ташаббусларимиз ривожига хизмат қилиши шубҳасиз» дейилади Президентнинг табрик мактубида.