Вилоят фахрийлари кенгаши раиси Ж. Мауленқулов бошчилигидаги бир гуруҳ фахрийлар Арис шаҳрига ташриф буюришди. Вилоятнинг турли бурчакларидан келган 80 нафардан зиёд фахрийни шаҳар ҳокимининг ўринбосари Р. Айтбаев бошчилигидаги гуруҳ аъзолари шаҳарга кираверишда ўрнатилган паровоз ёдгорлиги қошида кутиб олишди.  
Меҳмонлар дастлаб “Тең қоғам” ижтимоий маркази сифатида ўтган йилдан фаолиятини бошлаган иншоотни кўздан кечиришди. Бу масканда имконияти чекланган фуқаролар ва болаларга бепул хизматлар кўрсатилади.   
Вилоят миқёсида уюштирилган фахрийларнинг сайёр семинари шаҳар “Фахрийлар маркази” фаолияти билан танишиш билан давом этди. Шаҳар бувилар ҳайъати гуруҳи томонидан тайёрланган миллий таом ва ҳунармандчилик буюмлари кўргазмаси, санъаткор фахрийларнинг концерт дастури билан кутиб олишди. Шаҳар ҳокими Гулжан Қурманбекова меҳмонларни замонавий қиёфада жиҳозланган марказ фаолияти билан яқиндан таништирди.
– Ушбу марказ ҳаётини туғилган юрти ва халқининг ёрқин келажагига бағишлаган, бугунги кунда заҳматли меҳнатининг мевасини кўраётган нафақадор ва нуронийларга эҳтиром сифатида очилган. Табаррук оқсоқолларимиз орамизда маслаҳатгўй бўлиб юришсин. Улар келгусида ҳам эл равнақи йўлида хизмат қилиб, жамоат ишида фаол бўладилар, деб ишонаман, – деди Гулжан Мамитқизи.
Семинар иштирокчилари хайрли ишларнинг ташаббускори бўлган арисликларга миннатдорчилик билдиришди. Арис шаҳар бандлик ва ижтимоий дастурлар бўлимида ҳозир 2400га яқин имконияти чекланган фуқаро рўйхатга олинган, уларнинг 2300 нафари “Тең қоғам” ижтимоий маркази хизматидан мунтазам  фойдаланмоқда. Шу кунгача марказ 6 мингга яқин фуқарога бепул хизмат кўрсатди.