Туркистонга хизмат сафари билан ташриф буюрган Анқара губернатори Васип Шахин шаҳардаги спорт иншоотларини ҳам кўздан кечирди. Вилоят ҳокими Ўмирзақ Шўкеев мартабали меҳмонни замонавий спорт мажмуалари, шунингдек, шаҳарнинг тараққиёт режаси билан таништирди.
Дастлаб “Туркистан–Арена” марказий ўйингоҳида бўлган Анқара губернатори иншоотнинг УЕФА талабларига мос эканлигига тўхталиб, сифатига юксак баҳо берди. Васип Шахин мазкур ўйингоҳда Туркиянинг машҳур клублари иштирокида халқаро ўртоқлик учрашувлари ўтказишга ҳаракат қилишини айтди.
Туркистондаги ўйингоҳ 7000 томошабинга мўлжалланган. Мажмуада бир қанча ўқув-машғулот заллари мавжуд. Унинг асосий қисми футбол майдони ва енгил атлетикага мўлжалланган ёпиқ аренадан иборат. Акробатика, бокс, оғир атлетика, бадиий гимнастика заллари замон талабига мос равишда жиҳозланган. Мажмуани “Самрұқ-Қазына” Туркистонга совға сифатида барпо этган.
Шундан сўнг, Анқара ва Туркистон раҳбарлари жорий йилда фойдаланишга топшириладиган халқаро теннис марказини кўздан кечиришди.