Дунё давлатлари коронавирусга қарши чекловларни яна кучайтирмоқда

Жаҳон соғликни сақлаш ташкилоти маълумотларига кўра, сўнгги икки ҳафта ичида коронавирус билан касалланганлар сони 30 фоизга ошган. Бундай ўсиш ЖССТнинг олтита минтақасидан тўрттасида кузатилмоқда. Бундан ташқари, ташкилот маълумотларига кўра, маймун чечаги хавотирли муаммога айланди. ЖССТ экспертлари 18 июль куни учрашиб, хавф даражасини муҳокама қилади.

Қозоғистонда коронавирус билан касалланганлар сони кундан-кунга ортиб бормоқда. Натижада, мамлакатда яна ниқоб тақиш тавсия этилади.

Жонс Хопкинс университети ва Wоrldometer интернет портали маълумотларига кўра, дунёда SARS-CоV-2 коронавируси билан касалланганлар сони 553 миллиондан ошди. АҚШ касаллик юқтирганлар сони бўйича ҳамон етакчилик қилмоқда. У ерда касаллар сони 88,2 миллион кишидан ошади.

Омикрон ВА.4 ва ВА.5 нусхалари Европа ва Америкада CОVID-19нинг қайта тарқалишига сабаб бўлмоқда. Коронавируснинг янги штамми Ҳиндистонда ҳам аниқланган ва Жаҳон соғликни сақлаш ташкилоти томонидан назоратга олинган.

Қозоғистонда коронавирус билан касалланганлар сони ортиши муносабати билан идоралараро комиссиясининг 1 июлдаги қарорига биноан «Транспорт воситаларида коронавирус инфекциясига қарши санитария-профилактика ва санитария-эпидемия тадбирларини ўтказиш тўғрисида»ги қарори кучга кирди.

Эндиликда қайд этилган ҳужжатга кўра, мунтазам йўловчи ташишни амалга оширувчи ташкилотлар (ҳаво, сув, темир йўл, метро) транспорт воситаларининг кондиционер ва вентиляция тизимларини текшириб, вентилятор фильтрларини алмаштиришлари шарт. Шунингдек (платформали автобуслар бундан мустасно), транспорт воситасидаги йўловчилар сони ўринлар сонидан ошмаслиги керак. Автотранспортнинг ички қисмини вентиляция қилиш, дезинфекциялаш воситаларидан фойдаланган ҳолда салонни мунтазам тозалаш ва смена тугагандан сўнг жамоат транспортини дезинфекция қилиш талаб этилади.

Шу билан бирга, йўловчиларга аэропорт, вокзал, техник хизмат кўрсатиш шохобчалари бинолари ва жамоат транспортида ниқоб тақиш тавсия этилди.