Бугун Президент Қасим-Жўмарт Тўқаев раислигида Ҳукуматнинг кенгайтирилган мажлиси видеоалоқа тартибида ўтди.

Мажлисда Ҳукумат аъзолари, вилоятлар, Нур-Султан, Алмати, Шимкент шаҳар ҳокимлари, марказий давлат органлари ва миллий компаниялар раҳбарлари иштирок этди.

Давлат раҳбари Ҳукумат аъзолари ва минтақалар ҳокимлари диққатини халқимизни хавотирга солаётган бир қатор масалаларга қаратди. Президент пулнинг қадрсизланиши ҳамда озиқ-овқат маҳсулотлар баҳосини барқарорлаштириш, аҳоли даромадини ошириш ҳамда одам капиталини ривожлантириш, пул-насия ва солиқ-бюджет сиёсатини такомиллаштириш, энергетика хавфсизлигини таъминлаш, автойўл инфратузилмасини ривожлантириш масалалари бўйича аниқ вазифаларни белгилаб берди. 

Шунингдек, Президент Бош вазир Алихан Смайилов ва Миллий банк раиси Ғалимжан Пирматовнинг маърузаларини тинглаб, Ҳукумат фаолиятига ўртача баҳо берди. 

Мажлис давомида Давлат раҳбари баъзи соҳа вазирлари фаолиятидан кўнгли тўлмади. Бош вазир ўринбосари, Савдо ва интеграция вазири Бақит Султанов, Қишлоқ хўжалиги вазири Ербўл Қарашўкеев, Экология, геология ҳамда табиий захиралар вазири Серикқали Брекешевга ҳайфсан, Рақамли тараққиёт, инновациялар ва аэрокосмик саноати вазири Бағдат Мусинга огоҳлантириш берди.