Қозоғистон Республикаси Бош вазири Алихан Смаилов Транс-Каспий халқаро транспорт йўналишини ривожлантириш масалаларига бағишланган йиғилиш ўтказди. 

Мажлисда «Достық-Мойынты» участкасида иккинчи темир йўл, Ақтов портида контейнерлар майдони, Алмати станциясининг айланма темир йўли тармоғини барпо этиш, «Достық-Мойынты» участкасида йирик инфратузилма лойиҳаларини амалга ошириш ва йўналишнинг рақобатбардошлигини ошириш учун Транс-Каспий халқаро транспорт йўналишининг бошқа иштирокчилар билан ўзаро ҳамкорлик масалалари муҳокама қилинди.

Тадбирда Транс-Каспий йўлагининг қўшни минтақаларни бир-бирига боғловчи кўприк сифатидаги муваффақияти, товарларни минтақанинг хилма-хил географияси бўйлаб ўтказиш учун мультимодал транспорт марказлари зарур экани, ҳукуматлар янги лойиҳаларни бошлаш учун зарур бўлган катта маблағларни жалб қиладиган сармоявий муҳитини яратиш устида иш олиб боришлари зарурлиги таъкидланди.

Транс-Каспий алоқалари ва инфратузилмаларини ривожлантиришга қаратилган муҳокамада Каспий минтақаси дунёдаги энг кам ички боғланган минтақалардан бири ҳисобланиши ва савдо-сотиқ ҳамда бошқа алоқаларни кенгайтириш учун ишончли шарқ–ғарбий транзит йўлларини ташкил этишга киритилаётган сармоялар ҳажмини ошириш зарурлиги илгари сурилди. Минтақа мамлакатларининг Марказий Осиёни Жанубий Кавказ билан боғлайдиган ва ҳаётий инфратузилмани замонавийлаштирадиган янги транзит йўналишларини ишлаб чиқиши, ушбу ташаббусларни амалга ошириш учун молиялаштириш манбаларини излаб топиши жуда муҳим экани қайд этилди.