Туркистон вилояти ҳокими Ўмирзақ Шўкеев махсус хизмат сафари билан Тўлебий туманига ташриф буюриб, ғалла ўрим-йиғим жараёни билан танишди.

Вилоят раҳбари деҳқонлар билан учрашиб, ҳосилдорликни ошириш, қишлоқ хўжалигида янги технологияларни қўллаш масалалари юзасидан фикр алмашди.

Тўлебийлик деҳқонлар ғалла етиштириш, боғдорчилик соҳасида катта тажриба тўплаган. Деҳқон хўжаликларида бошоқли дон экинлари парвариши агротехник тадбирлар асосида олиб борилди. Натижада юқори ҳосил етиштирилди. Шу кунларда туманда миришкор деҳқонлар қалб қўри билан етиштирилган ғалла ҳосилини йиғиб-териб олиш ишлари қизғин давом этмоқда.

Деҳқонлар тумандаги 15 минг гектар майдонга экилган кузги ва ёзги буғдойнинг ҳар гектаридан 20-25 центнергача ҳосил олишни мўлжалламоқда.

Миришкорларнинг машаққатли меҳнати эвазига етиштирилган ҳосилни нест-нобуд қилмай йиғиштириб олиш учун ўрим-йиғимга 57та комбайн, 500дан зиёд қишлоқ хўжалиги техникаси жалб этилди.

Вилоят раҳбари “Бирлик” ишлаб чиқариш ширкати далаларида бўлиб, ғаллакорлар меҳнатига ижобий баҳо берди.

– Минтақанинг табиий-иқлим хусусиятларини ҳисобга олган ҳолда вилоятда кластерни ривожлантиришга  устувор аҳамият қаратилмоқда. Бу саноатда кичик ва ўрта бизнесни ривожлантириш, меҳнат унумдорлигини ошириш имконини берди. Томорқа хўжаликларини ривожлантириш лойиҳасининг амалга оширилиши кам таъминланган оилаларнинг ижтимоий шароитларини яхшилаш, уларни иш билан таъминлаш имконини берди. Томчилатиб суғориш технологияси асосида 10та хўжалик ташкил этилди. Улар ҳозир 1 млн. тенгедан зиёд қўшимча даромад олмоқда, – деди вилоят ҳокими Ўмирзақ Шўкеев.

Далаларда ғалла ҳосилининг мўллиги кўриниб турибди. Бўлиқ бошоқлар юртимиз дастурхони тўкинлигидан дарак бераётгандай.