Билимлар куни арафасида Сайрам туманида 5та хусусий мактаб фойдаланишга топширилди. Улардан бири Қайнарбулоқ қишлоқ округидаги 300 ўринли бошланғич  мактаб бўлса, қолган 1200 ўринли 4та умумий ўрта мактаб Манкент қишлоқ округида қад ростлади.

Дастлаб туман ҳокими У. Садибеков вилоятнинг фахрий фуқаролари А. Дўсбўлов ва С. Бараховалар билан бирга Қайнарбулоқ қишлоғидаги 300 ўринли “Бақдаулет” хусусий бошланғич мактабнинг тантанали очилишида иштирок этиб, рамзий тасмани қирқдилар. Янги мактабнинг устозлари, ўқувчилари ва ота-оналарга эзгу тилакларини изҳор этишди.

Қурилиши 2021 йилда бошланиб, янги ўқув йилига туҳфа қилинган мактаб қурилишига тадбиркор Сиқимбай Сағиндиқов шахсий маблағидан 210 млн. тенге сарфлади. Янги таълим даргоҳида асосий фанлардан дарс бериш учун 20 нафар муаллим ишга қабул қилинди.

Сўнг туман ҳокими Уласбек Садибеков таниқли тадбиркор Низомхон Сулаймонов маблағига барпо этилган, уч тилда билим берадиган 1200 ўринли Ал-Форобий умумий ўрта мактабини очиб, Билимлар кунига бағишланган тадбирда иштирок этди.

Туман ҳокими ўринбосарлари Н. Сулаймонов барпо этган мактабларнинг тақдимот маросимида иштирок этишди.

Хусусий тадбиркор мактаблар қурилиши учун 1 млрд. 200 млн. тенгедан зиёд маблағ сарфлаган. Бугунги кунда хусусий мактабларга 40 млн. тенгега мактаб формаси, 80 млн. тенгелик ўқув қуроллари харид қилинган. 2022-2023 йилларда замонавий таълим андазасига мувофиқ, уч тилда таълим берадиган 6та мактабнинг қурилиши якунланади. Жами 7200 болани таълим-тарбия, 660 ўқитувчини иш билан таъминлаш режаланмоқда.

Болаларни ташиш, овқатлантириш масалалари ҳал қилинган. Очиқ ва ёпиқ спорт иншоотлари муҳайё. Баъзи иншотларда бассейн ҳам бор.

Умуман олганда,  Сайрам туманида 10та хусусий мактаб қурилиши режаланса, уларнинг 5таси Билимлар кунида фойдаланишга топширилди.