Туркистон шаҳридаги “Экобозор”да арзонлаштирилган озиқ-овқат ва қишлоқ хўжалиги маҳсулотлари ярмаркаси ташкил этилди. Мақсад – нарх-навони барқарорлаштириш, аҳолига сифатли маҳсулотлар тавсия этиш эди. Вилоят қишлоқ хўжалиги бошқармаси раҳбарининг ўринбосари Нурбўл Бекмуратовнинг айтишича, савдо ярмаркасида барча туман ва шаҳарлардаги ишлаб чиқарувчилар иштирок этмоқда.

– Ярмаркага вилоят деҳқонлари ва товар ишлаб чиқарувчилари 500 тоннадан зиёд қишлоқ хўжалиги маҳсулотлари олиб келди. Улар 15-20 фоиз арзон баҳода сотилмоқда. Тадбир уч кун давом этади, агар аҳоли талаб қилса, яна давом эттирамиз, – деди у.

“Экобозор”даги ярмаркага 89 тонна гўшт ва гўшт маҳсулотлари, 157,5 тонна сабзавот, 23 тонна картошка, 68,5 тонна сут маҳсулотлари, 59 тонна полиз маҳсулотлари, 51 тонна озиқ-овқат, 3 тонна асал, 26 тонна шарбат ва консерва маҳсулотлари, 3 тонна балиқ, 20 минг дона тухум ва 15 тонна нон маҳсулотлари келтирилди. Бундан ташқари, “Туркистон” ижтимоий-тадбиркорлик корпорациясининг барқарорлаштириш жамғармаси орқали шакар, ун ва бошқа маҳсулотлар ҳам арзон баҳода сотилмоқда. Тадбирда Астана шаҳрида ўтган ярмаркага ҳисса қўшган вилоят тадбиркорларига пойтахт ҳокимининг Фахрий ёрлиқлари топширилди.

Маълумки, Туркистон шаҳридаги “Экобозор” жорий йилда ишга туширилди. Бу ерда омбор, видеоназорат камералари мавжуд. Бозорда деҳқонлар ўз маҳсулотларини бевосита сотишлари мумкин.