“Қулай мактаб” миллий  лойиҳаси бўйича Туркистон вилоятида 86та мактаб барпо этиш режаланган. Президент  раислигида ўтган Ислоҳотлар бўйича олий кенгашда кўриб чиқилган “Қулай мактаб” умуммиллий лойиҳасини амалга ошириш масаласига кўра Туркистон вилоятининг  ҳокими Дархан Сатибалди соҳага масъул раҳбарларга аниқ топшириқлар берди. Янги намунадаги мактаблар барпо этиш, муҳандислик тизимларини юритиш, педагог кадрлар билан таъминлаш ва қурилишини вақтида якунлаш юзасидан топшириқлар юкланди.  Бу орқали уч сменали, харобали, эскирган мактаблар сонини камайтириш кўзланган.

– Давлат раҳбари раислигида ўтган Ислоҳотлар бўйича олий кенгашда 2023 йили қурилиши бошланадиган мактаблар учун ер участкасини ажратиш ва зарур инфратузилма билан таъминлаш юзасидан барча аниқ топшириқлар берилди. Шу билан бирга, таълим сифатини яхшилаш масаласи ҳам  доимий эътиборда бўлиши  зарур, – деди вилоят ҳокими Дархан Сатиб­алди.

2023-2025 йилларга мўлжалланган республика бюджети лойиҳасида ушбу мақсадга 400 млрд. тенгедан зиёд  маблағ ажратилади. Лойиҳа доирасида очилган мактаблар замонавий фан кабинетлари, лабораториялар билан тўлиқ таъминланади. Туркистон вилоятида 900, 1200 ва 2000 ўринли мактаблар барпо этиш режаланган.  86та  янги, қулай мактабда 60 мингдан зиёд боланинг таълим олиши учун барча шароитлар яратилади.

Туркистон вилоятида жами 983 (жумладан 75та хусусий) мактаб бор. Сўнгги йилларда 83та янги мактаб фойдаланишга топширилди, ҳозир 59та мактаб  барпо этиляпти.