Сайрам туманининг агросаноат соҳасида жорий йилнинг 10 ойида 108 млрд. тенгедан зиёд маҳсулот етиштирилиб, ўтган йилнинг шу даврига нисбатан 4,5 млрд. тенгега ошган. Буни Сайрам тумани ҳокими Уласбек Садибеков маълум қилди.

Жорий йил қишлоқ хўжалиги, озиқ-овқат ҳамда қайта ишлаш саноати ходимлари кунига бағишланган “ALTYN KUZ – 2022” ҳосил байрамида туман “Агросаноат мажмуасини ривожлантириш кўрсаткичларининг ижроси” бўйича вилоятда етакчи ўринни эгаллади.

– Умуман, минтақавий маҳсулот ҳажми жорий йил 10 ойда 202 млрд. тенгега етди. Етиштирилган маҳсулотнинг 53 фоизи қишлоқ хўжалиги соҳасига,  24 фоизи саноат соҳасига, 5,8 фоизи қурилиш соҳасига тўғри келади. “Бир майдондан икки марта ҳосил олиш” лойиҳаси жорий йилда 306,2 гектарга етди. Қайта ишлаш саноати соҳасида 41 млрд. тенгелик маҳсулот ишлаб чиқарилиб, туман вилоятда 2-ўринни эгаллади. 

Туман иқтисодиётига йил бошидан буён 32,9 млрд. тенге сармоя киритилди. Сармоя жалб этиш кўрсаткичи бўйича туман вилоятда 3-ўринни эгаллади, – деди туман раҳбари.