Давлат раҳбарининг туркий тилли мамлакатларни бирлаштирадиган махсус иқтисодий минтақа қуриш тўғрисидаги топшириғи доирасида Туркистон шаҳрида «TURAN» махсус иқтисодий минтақаси ташкил этилади. Туркистон вилояти ҳокими Дархан Сатибалди муҳим лойиҳани амалга ошириш масаласини муҳокама қилиш мақсадида мутасадди соҳа раҳбарлари билан учрашди.

– Устувор йўналишларимиздан бири – ишлаб чиқариш ва иш ўринларини очиш. Шу йўналишда барча имкониятларни кўриб чиқяпмиз. Шу билан бирга, туркий давлатлар  сармоясини жалб этиш муҳим, – деди Д. Сатибалди.

Қозоғистоннинг «TURAN» махсус иқтисодий минтақасини ташкил этиш ташаббуси ноябрь ойида туркий тилли давлатлар ташкилотига аъзо мамлакатлар раҳбарлари иштирокида Самарқандда ўтган Саммитда қўллаб-қувватланган эди.  Асосий мақсад – Туркистон шаҳри тараққиётини жадаллаштириш ҳамда шаҳарнинг сармоявий салоҳиятини оширишдир. Унинг майдони 4 гектарни ташкил этиб, 6та кичик ҳудуддан иборат. Булар: тарихий марказ, маъмурий-тадбиркорлик маркази, Greenfield (Ўранғай қишлоғи), Brownfield саноат қўшма ҳудуди (Кентов шаҳри) ҳамда Туркистон шаҳри ва халқаро аэропорт ҳудуди.