Туркистон вилояти ҳокими Дархан Сатибалди Венгриянинг Қозоғистондаги фавқулодда ва мухтор элчиси Отто Иван Рона билан учрашди.

Дархан Сатибалди Қозоғистон ва Венгрия ўртасидаги муносабатларнинг юксак даражада эканлигини таъкидлаб, Венгрия сармоясини жалб қилишга, икки томонлама муносабатларни кенгайтиришга масъул эканлигини маълум қилди.

– Биз Венгрия сармоядорлари билан ҳамкорлик қилишга тайёрмиз. Шу мақсадда “TURAN” махсус иқтисодий минтақаси ташкил этилмоқда. Минтақа қишлоқ хўжалиги бўйича юксак салоҳиятга эга. Сармоя билан бирга маданият, таълим  соҳаларида ҳам ҳамкорлик ўрнатиш айни муддао, деб биламан. Бундай учрашувлар ўзаро алоқаларни мустаҳкамлайди, – деди Д. Сатибалди.

Венгрия элчиси Отто Иван Рона Туркистондаги имкониятларни ўз давлатининг бизнес вакилларига тавсия қилишини айтди.

– Албатта, бизнесга бевосита таъсир кўрсата олмасак-да, ишончим комилки, вилоят ва венгриялик сармоядорлар ўртасида воситачи сифатида иш юрита оламиз.  Биз ахборот технологиялари, қишлоқ хўжалиги, паррандачиликни ривожлантиришга доир тавсиялар бера оламиз. Кейинги учрашувда аниқ таклифларни муҳокама қилиб, шартнома тузамиз, – деди элчи.