Туркистон вилояти ҳокими ўринбосари Бейсен Тажибаев «TURKISTAN» телеканали жамоаси билан учрашди. Очиқ шаклда ўтган норасмий учрашувда журналистлар ўз фикр ва таклифларини билдириб, ахборот соҳасини ривожлантириш масалаларини муҳокама қилишди. Вилоят ҳокими ўринбосари журналистика соҳаси жуда муҳимлигини айтиб, ёш телевидение жамоасининг ташаббус ва лойиҳаларини юқори баҳолади.

– Журналистика соҳаси вакили сифатида ижод жараёни билан танишман, меҳнати оғир эканлигини жуда яхши биламан. Телеканал Туркистон ўлкасининг ижобий мавқеини шакллантириш, ахборот ва мафкуравий йўналишларни амалга оширишда улкан аҳамиятга эга. Туркистон вилоятига бу йил 5 йил тўлди. Шаҳарнинг шаклланиш даври якунланиб, унинг инфратузилмаси барпо этилди. Энди биз тараққиёт босқичига ўтмоқдамиз. Энди сиз Янги Қозоғистоннинг янги ғояларни амалга ошириш босқичига келдингиз. Телетомошабинларни вилоят янгиликлари билан таништириш, меҳнаткашларни рағбатлантириш, эл орасида кўзга тушмаган истеъдод соҳибларини кенг оммага танитиш, сайёҳлик, спорт, тиббиёт ва бошқа соҳаларда янги ташаббусларни амалга ошириш зарур. Телеканални қўллаб-қувватлаш давом этади ва кучайтирилади. Биз сизнинг фикр ва таклифларингизни тинглаб, биргаликда ишлашга тайёрмиз, – деди Бейсен Даулетули.

Телеканал директори Жанахмет Ағибаевнинг айтишича, телеканалнинг моддий-техник базаси яхшиланиб, қатор долзарб муаммолар ҳал этилган. Шу билан бирга, амалга оширилаётган янги лойиҳалар билан таништирди. У ижтимоий тармоқларда аҳоли талабидан келиб чиққан ҳолда ахборотлаштириш ишлари жонлантирилаётганини таъкидлади.

Учрашувда телеканал журналистлари ўзларини қизиқтирган саволларни бериб, эркин фикр алмашдилар. Шу билан бирга, Туркистон вилояти жамоат тараққиёти бошқармаси бошлиғи Ансар Ўсербаев ва Туркистон вилояти ҳокимининг матбуот котиби Мира Сулейменова ахборот соҳасидаги муаммолар юзасидан ўз фикр-мулоҳазаларини билдиришди.