Мақтаарал туманида Қозоғистон – Ўзбекистон чегараси бўйлаб “Марказий Осиё” халқаро саноат кооперацияси марказини ташкил этиш режалаштирилган. “Атамекен” божхона бекати ва “Сирдарё” божхона бекати ёнида мазкур марказни ташкил этиш таклифи билдирилди. Қозоғистон Республикаси Савдо ва интеграция вазири ўринбосари Қайрат Тўребаев амалий ташриф билан Мақтаарал туманида бўлиб, марказ ташкил этиш учун танланган ер участкалари билан танишди.

Туркистон вилояти ҳокимининг ўринбосари Ермек Кенжеханули транспорт инфратузилмаси ҳолати тўғрисида ҳисобот бериб, галдаги режалар билан таништирди.

Туман ҳокими Бахит Асанов “Атамекен” божхона бекати яқинидаги 50 гектар ер майдони ҳақида сўз юритар экан, мазкур ҳудуднинг инфратузилмаси борасида ҳам маълумот берди. Шу билан бирга, транспорт инфратузилмаси ҳолати ва юзага келаётган муаммолар ҳақида атрофлича ахборот берилди.

Бу ердан М-39 “Тошкент – Термиз” халқаро автомобиль йўли ўтади. Тегишли инфратузилма барпо этилса, индустриявий ва савдо майдонларини очиш, янги иш ўринларини кўпайтириш имкони яратилади.

Сўнг вазир ўринбосарига 2023-2024 йилларга мўлжалланган “Атамекен” божхона бекатини замонавийлаштириш учун сарфланган маблағларни “Сирдарё” божхона бекатига йўналтириш, “Мақтаарал-Дарбаза” божхонаси қурилиши ҳақида маълумот берилди. 

Қ. Тўребаев вилоятдаги темир йўл тизими ҳолати билан ҳам танишиб, инфратузилмани такомиллаштиришга ёрдам беришини айтди. Маҳаллий ижро ҳокимияти органларига бу борадаги ишларни тизимли йўлга қўйиш топширилди.