Вилоят ҳокими Дархан Сатибалдининг Туркистон шаҳри аҳолиси билан учрашувида муҳим масалалар кўтарилди. Аҳоли ҳам талаб ва таклифларини очиқ билдирди. 

– Махсус мутахассислар таклиф этилиб, ер ажратилади. Ўйин майдончалари қуриш бўйича ишлар олиб борилмоқда, – деди ҳоким. Шу билан бирга уюшган жиноятчиликка қарши курашни кучайтириш, давлат грантлари ажратишда уюшган жиноятчиликнинг олдини олиш, кўп болали оилаларни уй-жой билан таъминлаш бўйича сўзга чиққан фуқароларнинг таклиф ва саволларига жавоб берди.

– Минтақадаги уюшган жиноятчиликка қарши биринчи одам – менман. Биз ҳам фуқароларнинг қонунга риоя қилиб, ҳаёт кечиришлари тарафдоримиз. Уюшган жиноятчиликка йўл қўйган раҳбарлар ва давлат хизматчилари ишдан бўшатилиши шарт. Бизга аниқ далил керак. Ва умуман бу иллатга қарши бутун жамият бўлиб курашишимиз зарур. Биласизми, пора олувчи ҳам, берувчи ҳам жавобгардир. “Артспорт” дастури, болалар боғчаларини молиялаштиришда, баъзи тадбиркорлар қонунни бузиб, бошқа мақсадлар учун маблағ сарфлагани аниқланди. Уюшган жиноятчиликка қарши кураш тўхтамайди, – деди Дархан Сатибалди. 

Шунингдек, учрашувда яна бир муҳим янгилик тилга олинди. Туркистон шаҳридан 6та халқаро ҳаво қатнови йўлга қўйилади.

– Ўтган йили Туркистон халқаро аэропортидан Истанбул ва Қувайтга бевосита рейслар очилган эди. Бугунги кунда биз Ҳукуматга мурожаат қилиб, Москва, Анталия, Дубай, Tбилиси, Тошкент ва Самарқандга қатновларни йўлга қўйиш таклифини киритдик. Ички йўналишда эса Астана ва Алматига парвозлар сонини кўпайтиришга оид ишларни юритмоқдамиз. Натижада Туркистонга сайёҳлар ва ташриф буюрувчилар сони 2018 йилга нисбатан 4 баравар ошди, – деди вилоят ҳокими.

Вилоят ҳокими ўтган йилги учрашувларда аҳоли томонидан кўтарилган масалаларнинг аксарияти ҳал этилганини маълум қилди. Жумладан, мактаблар масаласи. Яқин келажакда Аҳоли сонининг ошиши муносабати билан «Қулай мактаб» лойиҳаси доирасида 7та мактаб қурилади. Вилоят марказида маданий, спорт, сайёҳлик ва бошқа иншоотлар барпо этилади.