Туркистон минтақасини сайёҳлик йўналишида жонлантириш мақсадида махсус йўл харитаси ишлаб чиқилди. Унда 6та асосий йўналиш кўзда тутилган. Хусусан, сайёҳлик иншоотларидаги инфратузилмани такомиллаштириш, хизмат кўрсатиш сифатини ошириш, маркетинг хизматини кучайтириш, “Open Turkistan” ва туман, шаҳар ҳокимликларининг фаолиятини жонлантириш каби масалалар қамралган. Вилоят ҳокими Дархан Сатибалди раислигида ўтган мажлисда ушбу лойиҳалар таништирилди. Минтақа раҳбари сайёҳлик салоҳиятини юксалтириш йўналишидаги тадбирларни кучайтиришни топширди.

Йиғилишда вилоят сайёҳлик бошқармаси раҳбари Нурдаулет Медеуов маъруза қилди. Унинг айтишича, мазкур йўл харитасининг ижроси 

таъминланса, натижада 2025 йилда ички сайёҳлар сонини 25 фоизга, хорижлик сайёҳларнинг сонини 2,5 бараварга, ушбу соҳадаги хизмат ҳажмини 30 фоизга ошириш кутилмоқда. Минтақадаги машҳур сайёҳлик иншоотлари ривожланади. Шу боис, салоҳияти юксак 10та сайёҳлик иншооти танлаб олинган.

Жорий йилда вилоятимизда сайёҳлик соҳасида 37та сармоявий лойиҳани амалга ошириш режаланган. Ўтган йили вилоят сайёҳлик соҳасига 53,5 млрд тенге сармоя жалб қилинди. Туркистон шаҳрига халқаро ҳаво йўлларини кенгайтириш мақсадида Венгриянинг “Wizz Air” авиакомпанияси билан ҳамкорлик натижасида амалга оширилган “Туркистон – Абу Даби (БАА)” ҳаво йўналиши бўйича қатновлар сони оширилади.

Таъкидлаш жоиз, Туркистон вилояти тарихий ва маданий обидаларга бой ҳамда очиқ осмон остида ўзига хос музейга айланмоқда. Вилоят ҳудудида 1780та тарихий ҳамда маданий ёдгорликлар мавжуд.