Бу ҳақда брифингда туман ҳокими Н. Байғут маълум қилди

– Туманнинг ички ялпи маҳсулот ҳажми 80 миллиард 244 миллион 700 минг тенгени ташкил этди. Асосий капиталга йўналтирилган сармоя миқдори 11 миллиард 357 миллион 200 минг тенге. Саноат маҳсулотлари ҳажми 13 миллиард 314 миллион 900 минг тенгега етди. Бу кўрсаткичлар бўйича туман вилоятда пешқадам.

“Оддий буюмлар иқтисодиёти” дастури доирасида 7та, “”Бизнеснинг йўл харитаси” дастури доирасида “Даму” тадбиркорликни қўллаб-қувватлаш жамғармаси” билан ҳамкорликда “Иккинчи даражали банк” қўшма лойиҳаси тайёрланиб, 31та лойиҳа молиялаштирилди, – деди Н. Байғут. 

Табиати хушҳаво туманда этно­сай­ёҳликни ривожлантиришга устувор аҳамият қаратилмоқда. Бугунги кунда туманда 32та сайёҳлик иншооти фаолият юритмоқда. Жумладан, 3та меҳмонхона, 6та болалар соғломлаштириш лагери, 2та соғломлаштириш маркази, 21та сайёҳлик ҳудуди ва сайёҳлик базаси мавжуд.

Аҳоли бандлиги ҳам туман ҳокимлигининг доимий эътиборида. Йил бошидан буён ижтимоий иш ўринларига 132 ёшлар амалиётига 319, “Илк иш ўрни” лойиҳасига 35 фуқаро йўлланди.  Давлат гранти бўйича режадаги 183 фуқарога қайтаримсиз грант берилди. 

Ҳақ тўланадиган жамоат ишларига 1066 фуқаро жалб қилинди. Давлат раҳбарининг “ҳар 10 минг фуқарога 100 доимий иш ўрнини очиш” топшириғи бўйича 848та иш ўрни ташкил этилди.