Коронавирусга карантин эълон қилиниши муносабати билан Туркистон вилояти таълим соҳасида ҳам юқумли дарддан сақланиш чора-тадбирлари кўрилмоқда.

Жумладан, ўқувчиларнинг билим олишини онлайн-тизимга ўтказиш устида ишлар олиб борилмоқда. Агар карантин муддати чўзиладиган бўлса, унда таълим соҳаси ҳам масофадан ўқитишга ўтилади. 

Буни вилоят инсон салоҳиятини ривожлантириш бошқармасининг раҳбари Рахимбек Жўлаев маълум қилди.

Шунингдек, брифингда Туркистон вилоят жамоат саломатлиги бошқармаси раҳбари вазифасини бажараётган Салтанат Жамалова вилоят миқёсида коронавирус инфекцияси билан оғриган беморлар рўйхатга олинса, уларни ётқизиш учун инфекциявий стационарларда 100та ўрин тайёрлаб қўйилганини маълум қилди. 

– Коронавирус инфекциясига ўхшаш касалга чалинган беморларни касалхонага ётқизиш, ташҳисини аниқлаш мақсадида 240 ўринли провизор стационарлари тайёрланди. Жами – 340 ўрин. Бундан ташқари, барча туман ва шаҳарлардаги юқумли касалликлар бўлимлари ҳам алоҳида тайёргарликдан ўтди, – деди у.

Брифингда иштирок этган яна бир раҳбар – вилоят бандлик ва ижтимоий дастурларни мувофиқлаштириш бошқармаси раҳбари Асия Темирбаева, идора тасарруфидаги барча муассасаларда карантин эълон қилинганини айтди.