Тўлебий туманида буюк шоир ва мутафаккир Абай Қунанбаевнинг 175 йиллигига бағишлаб адабий-бадиий ва маданий-маърифий тадбирлар ўтказилмоқда. Истиқлол байрами арафасида Ленгер шаҳрида Абай хиёбони очилди. 

Ҳомийлар ёрдамида барпо этилган иншоотнинг очилиш маросимида туман ҳокими Б. Ўмарбеков, фаоллар ва фахрийлар, ОАВ вакиллари ва Қозоғистон ёзувчилар уюшмаси аъзоси Темирғали Кўпбаев иштирок этишди. 

– Бугунги тадбирни ташкиллаштиришдан мақсад – буюк маърифатпарвар шоир ва мутафаккир руҳига таъзим қилиб, унинг бой адабий меросини тарғиб қилиш, – деди Б. Ўмарбеков. – Эзгулик ва дўстлик куйчиси Абай Қунанбаевнинг шарафли номи ва бой ижодий мероси нафақат қозоқ халқи, айни пайтда бутун туркий халқларнинг ҳам қалбида безавол яшаб келмоқда, бизнинг миллат бўлиб бирлашишимиз, эл бўлиб тараққий этишимизга йўл очувчи бебаҳо қадриятдир. 

– Абайни фақат қозоқ халқининггина эмас, балки бутун туркий оламда фалсафий фикрлар тараққиётига катта ҳисса қўшган, адабий тафаккурни нурлантирган, мавжуд ҳаётни санъаткорона бадиий акс эттирган улкан мутафаккир адиб, десак муболаға бўлмайди, – деди Т. Кўпбаев.