Туркистон вилоятида миллий спорт турларини жаҳон миқёсида ривожлантириш мақсадида вилоят чемпионати ва Зиябек Жеткеров соврини учун кўпкаридан вилоят турнири ўтди.

Сайрам туманидаги Ақсуат отчопарида ўтган мусобақада Сайрам, Тулкибош, Тўлебий, Қазиғурт, Ўрдабоши, Байдибек туманларидан энг кучли чавандозлар иштирок этишди. Қизғин тортишувлар билан ўтган вилоят чемпионатида 6та жамоа қатнашиб, куч синашди. Беллашувда Ўрдабоши туманининг терма жамоаси бош совринни қўлга киритди. Тулкибошлик чавандозлар кумуш, Қазиғурт туманидан келган йигитлар бронза медалига сазовор бўлишди. 

Кўпкардан Қозоғистоннинг тўққиз карра чемпиони бўлган спорт фахрийси Абилхан Даулбаев тадбирнинг очилиш маросимида сўзга чиқиб, турнирнинг моҳиятига тўхталди.

Мусобақани юксак даражада уюштирган вилоят спорт бошқармаси ғолиблар ва совриндорларни махсус диплом, медаллар ва Зиябек Жеткеровнинг пул мукофотлари билан тақдирладилар.

 Шунингдек, “Үздік салымшы” номинацияси билан ўрдабошилик полвон Нурлибек Асқаров, “Үздік қорғаушы” тулкибошлик Мамит Адилет томошабинлар олқишини қозонди. Вақтида нуфузли мусобақаларнинг ғолиби бўлган Зиябек Жеткеров миллий спортни ёшлар орасида кенг тарғиб этиш зарурлигини таъкидлади.

Кўплаб спортчиларимизнинг куч-ғайратини синовдан ўтказган беллашувда учқур отлар ҳам аниқланди. Таниқли Резви оти “Үздік сәйгулік” атанди. 

 Мусобақага ҳакамлик қилган Жанбатир Бекмусаев “Энг яхши ҳакам” номинацияси билан мукофотланди.