Республикамизда ёшлар орасидаги футбол мавсумини “Арман” республика турнири очиб бериши анънага айланган. У ҳар йили Тараз шаҳрида уюштирилади. Яқинда кучли жамоалар иштирок этган финал босқичи ниҳоясига етди. Унда шиддатли ўйин кўрсатган “Ордабасы” клубининг “Оңтустік” академияси жамоаси фахрли учинчи ўринни эгаллади.

“А” гуруҳида улар “Ордабасы”, ”Жас Қыран” жамоаларидан устун келса, “Қайрат” ва ”Тараз” жамоаларига ютқазишди. Учинчи ўрин учун бўлган баҳсда “Жұлдыз” жамоасидан устун келди. Мусобақа давомида жамоа аъзолари – Алиби Абдиманап, Мағжан ва Биржан Тўқтибай, Бекзод Хомутов, Серик Рисбек, Ерасил Байузақлар гол уришга муваффақ бўлдилар. Мақсат Қурмангазин эса турнирнинг “Энг яхши дарвозабони” бўлди.
“Оңтустік” жамоаси Алматида ўтган “Nauryz CUP-2021” мусобақасида ҳам муносиб иштирок этиб, фахрли иккинчи ўринни эгаллади. Турнир ғолиби “Қайрат-1” жамоасидан голлар ҳисобигагина ортда қолди. Жамоа ҳимоячиси Нурдаулет Бейсенбай турнирнинг “Энг яхши ҳимоячиси”, дея эътироф этилди.