Давлат раҳбари Қасим-Жўмарт Тўқаев телефон орқали Туркистон вилояти ҳокими Ўмирзақ Шўкеев билан минтақадаги санитария-эпидемиологик ва ижтимоий-иқтисодий вазиятни муҳокама қилди.
Туркистон вилояти ҳокими Президентга коронавируснинг тарқалиши бўйича минтақанинг ҳозирги кунда “яшил” ҳудудда экани ҳамда 35 минг фуқаронинг вакциналанганини маълум қилди.
Қасим-Жўмарт Тўқаевга янги Сауран туманини ташкил этишга доир ахборот берилди. Ўмирзақ Шўкеевнинг айтишича, ҳозир янги ҳокимликнинг бошқарув тизими ва бюджети тасдиқланмоқда. Яқин кунларда ҳуқуқни ҳимоя қилиш органлари ва вазирликларнинг маҳаллий бўлимлари фаолият бошлайди. Янгидан ташкил этилаётган туманнинг аҳолиси 100 мингдан ошади, умумий майдони 650 минг гектарга яқин. Туманнинг маъмурий маркази Чўрноқ қишлоғи.
Шунингдек, суҳбат давомида электр қувватининг фавқулодда вазиятда ўчиши туфайли келтирилган зарарларни бартараф этиш, баҳорги сув тошқинининг олдини олиш ҳамда обикор деҳқончилик муаммоларини ҳал этишга алоҳида эътибор қаратилди.
Давлат раҳбари вилоят ҳокимига минтақадаги санитария-эпидемиологик аҳволни барқарорлаштириш ҳамда фуқароларни вакциналаш тадбирларини жонлантириш юзасидан қатор аниқ топшириқлар берди.