Елисей саройида Қозоғистон Республикаси Президенти Қасим-Жўмарт Тўқаев ва Франция Республикаси Президенти Эммануэл Макроннинг учрашуви ўтди. Бу ҳақда Қозоғистон Президентининг матбуот хизмати хабар берди.

Музокараларда Қозоғистон ва Франция ўртасидаги сиёсий мулоқотни янада мустаҳкамлаш, савдо-иқтисодий ва сармоявий ҳамкорликни ривожлантириш, маданий-гуманитар алмашувларни фаоллаштириш масалалари муҳокама қилинди.

Давлат раҳбарлари икки мамлакат ўртасида дипломатик муносабатлар ўрнатилганининг 30 йиллиги нишонланаётган жорий йилда икки томонлама алоқалар жадал суръат билан ривожланиб бораётгани, кенг сиёсий мулоқот чуқурлашиб, халқаро ташкилотлар доирасида томонлар ўзаро кўмаклашаётгани, парламентлараро мулоқот кенгайганини мамнуният билан қайд этдилар.

Кейинги йилларда мамлакатимизда Франция компаниялари иштирокидаги қўшма корхона ва лойиҳалар сони икки баравар  кўпайди. Энергетика, геология-қидирув, озиқ-овқат саноати ва савдо соҳаларида «Total Eren», «Veolia», «EDF», «Orano», «Lactalis», «Carrefour» ва «Shiever» каби халқаро миқёсдаги компанияларнинг ўзаро манфаатли фаолияти қайд этилди.

Маданий-гуманитар алоқаларни ривожлантиришнинг аҳамиятига эътибор қаратилди.

Қувонарли томони шундаки, дунёнинг ривожланган мамлакатларидан бири – Франция билан Қозоғистоннинг тенг ҳуқуқли давлат сифатида бир-бирига дўстона қўл узатиши, ўзаро иқтисодий ҳамкорликларнинг йўлга қўйилиши бу юртимиз истиқболини янада ёрқин бўлишидан далолат беради. Зотан, бугун Янги Қозоғистонга дунё қучоқ очмоқда.