Ёш шаҳматчилар беллашуви Туркистон шаҳрида ўтган республика чемпионатида вилоят спортчилари биттадан олтин ва бронза медалини қўлга киритишди

Туркистон шаҳрида шаҳматдан болалар, ўсмирлар ва ёшлар ўртасида Қозоғистон чемпионати ниҳоясига етди. Мусобақа классик, рапид ва блиц йўналишларида уюштирилди. 

Мамлакатимизнинг турли бурчакларидан келган 400 нафардан зиёд ёш шаҳматчи иштирок этган мусобақа муросаларга бой бўлди. 

Чемпионатнинг ёпилиш маросимида вилоят ҳокими девони раҳбари, Туркистон Шаҳмат федерацияси президенти Еркеғали Алимқулов иштирок этиб, ғолиб ва совриндорларни тақдирлади.

Мусобақада ҚР чемпионлигини қўлга киритганлар 2024 йили октябрь ойида Бразилияда ўтадиган болалар ва ўсмирлар ўртасидаги  жаҳон чемпионатига йўлланма олди. Кумуш медаль соҳиблари Осиё чемпионатида қатнашиш ҳуқуқига эга бўлди. 3-5-ўрин эгалари ёшларига қараб, жаҳон, Ғарбий Осиё ва ўқувчилар ўртасидаги Осиё чемпионатларида қатнашади. Туркистонда ўтган турнирнинг мукофот жамғармаси 5 580 000 тенгени ташкил қилди.

Қозоғистон Шаҳмат федерациясининг ижроия директори Гулмира Даулетова мусобақани юксак савияда уюштирган Туркистон вилоят ҳокимлигига миннатдорчилик билдирди.

Шаҳматдан ҚР давлат мураббийи Дастан Капаев ва бош ҳакам Тимур Қасимов ёш шаҳматчиларга миннатдорчилик билдириб, йўлланма соҳибларига муваффақият тилади. 

Жамғарилган мукофот пуллари бўйича Астана шаҳри биринчи ўринни эгаллади. Классик йўналишда 2010 йилда туғилган қизлар ўртасида туркистонлик Асия Асилхан чемпионликни қўлга киритди. Рапид йўналишида 18 ёшгача қизлар ўртасида Аселай Сейдулла бронза медали соҳибаси бўлди.