ҚР Президенти Нурсултан Назарбаев Бош вазир Бахитжан Сағинтаевни қабул қилди.

Давлат раҳбари учрашувда Ҳукуматнинг йил бошидан буён амалга оширган ишларига тўхталиб, иқтисодиётнинг турли шўъбаларидаги давлат ва соҳавий дастурларни янада сифатли бажаришнинг аҳамияти юқорилигига эътибор қаратди.

– Йил охирлаб қолди. Ўтган даврда салмоқли иш бажарилди. Биз ЭКСПО кўргазмасини, Ислом ҳамкорлик ташкилотининг илмий ва юқори технологиялар бўйича саммитини ўтказдик. Бошқа соҳалардаги лойиҳаларни ҳам амалга ошириб келмоқдамиз. Умуман, иқтисодиётимиз барқарор ривожланмоқда, – деди Элбоши.

Бахитжан Сағинтаев Қозоғистон Президентига жорий йилнинг 10 ойидаги ижтимоий-иқтисодий ривожланиш натижаларини айтиб, бир неча кўрсаткич ва индикаторлар бўйича ижобий ўзгаришлар бўлганлигини алоҳида таъкидлади. 

– Ўтган ўн ой якуни бўйича ички ялпи маҳсулот 4 фоизга ўсди.  6та соҳа бўйича қисқа муддатли иқтисодий индикаторларнинг ижобий ўсими кўзга ташланади. Шунингдек, йил сўнггигача мамлакатимизнинг транспорт-транзит салоҳиятини орттиришга йўналтирилган лойиҳаларни амалга ошириш орқали яхши натижаларни кутаяпмиз, – деди Бош вазир.

Шунингдек, Бахитжан Сағинтаев Нурсултан Назарбаевга умумий капиталга жалб этилган сармоя миқдори 6,5 фоизга ошганини маълум қилди. Бош вазир бу индикатор бўйича асосий ўсиш республика иқтисодиётига жалб этилган хусусий сармоялар миқдорининг ортиши ҳисобидан эканлигини билдирди.

Учрашув сўнггида Давлат раҳбари Б. Сағинтаевга қатор топшириқлар берди.