Қозоғистон Республикаси фуқаро авиацияси қўмитаси ва Ўзбекистоннинг авиация маъмурияти, шунингдек, икки мамлакатнинг авиакомпаниялари олиб борган музокараларга кўра, Қозоғистон ва Ўзбекистон Республикалари орасида авиақатновлар сони кўпаяди.

“Air Astana” авиакомпанияси 2017 йилнинг 2 декабридан ҳафтасига олти марта амалга оширилаётган Алмати – Тошкент қатновини еттитага етказишни режалаштирмоқда. Шунингдек, 3 декабрдан Астана – Тошкент йўналиши бўйича ҳафтасига уч марта амалга оширилаётган қатнов, тўрттага етказилди, яъни, эндиликда шанба куни ҳам йўловчиларга ана шу йўналиш бўйича хизмат кўрсатилади. 

“Ўзбекистон ҳаво йўллари” эндиликда Тошкент – Алмати қатновини душанба куни ҳам, яъни ҳар куни амалга оширади. Шунингдек, Тошкент – Астана қатнови 2018 йилнинг 4 мартидан якшанба куни ҳам амалга оширилади.

Натижада, икки давлат орасидаги ҳафталик қатнов 22тага етади. Алматидан Тошкентга бир кунда иккита самолёт учса, Астанадан Тошкентга ҳар куни бир марта парвоз қилинади.

Келажакда Самарқанд, Бухоро ва Урганчга ҳам авиақатновлар йўлга қўйилади.