Туркистон туркий оламнинг маданий пойтахти йили доирасида ҳамда машҳур Қазибек бий Келдибекулининг 350 йиллигига бағишланган халқаро Наврўз оқинлар айтишуви 25-26 март кунлари Туркистондаги Халқаро университетнинг маданият саройида ўтди. ТУРКСОЙ Халқаро ташкилоти ҳам­да вилоят ҳокимлиги ва маданият бошқармаси томонидан ташкил этилиб, ҚР Маданият ва спорт вазирлиги му­ассислик қилган ушбу халқаро тад­бирда Қирғизистон, Ўзбекистон ва Туркия мамлакати билан Қозоғистоннинг барча вилоятларидан оқинлар иштирок этишди. Айтишув аввалида вилоят ҳокими ўринбосари Уласбек Садибеков оқин ва томошабинларни ушбу сўз санъати бай­рами билан муборакбод этиб, вилоят ҳокими Жансейит Туймебаевнинг самимий қутловини етказди. Таниқли сатирик Кўпен Амирбек олиб борган, Ж. Жабаев номидаги мукофот соҳибаси Аселхан Қалибекова раислик қилган ҳакамлар ҳайъати қарорига биноан, 3 миллион тенгелик бош сов­рин Қўстанай вилоятидан келган иқ­ти­дорли оқин Айбек Қалиевга, би­рин­чи ўрин вилоятимиз вакили Жар­қинбек Наушабековга, иккита ик­кин­чи ўрин қирғизистонлик Асилбек Маратов ҳамда вилоятимиз вакили Нур­лан Есенқуловларга, учта учинчи ўрин қирғизистонлик Бўлат Назаров, Шар­қий Қозоғистон вилоятидан Сара Тўхтамисова ҳамда астаналик Сирим Ауесханларга насиб этди. Туркистондан иштирок этган таниқли оқин Бекарис Шўйбеков махсус мукофот билан тақдирланди.