Талабалар дарсдан қайтаётган вақт. Бугун улар стипендия олган кун. Шунинг учун бугун бекатда автобус кутаётган талабалар анча кам. Баъзилари стипендиясини олиб, бозор ораласа, бошқалари уч-тўрт бўлиб, такси тўхтатишяпти.
Марат ҳуқуқшунослик факультетининг тўртинчи босқич талабаси, шоир таъбири билан айтганда, «Туркистондан наъра тортиб келган мард ўғлон». Пулни олиб, анча кўнгли кўтарилди. Олган йигирма минг тенге стипендияси ва йилига икки марта бериладиган 9 минг тенге йўл нафақасини қандай ишлатишни ўйлаб турганида ўзи кутаётган 34-автобус келиб қолди. Ундан икки бақувват, ёши қирқларга бориб қолган йигит тушди, лекин, одамлар автобусга чиқиб бўлгач, улар ҳам қайтиб чиқишди. Сўнг, «ўрта бўш, ўртага ўтинглар!», деб, автобусга кўпроқ одам чиқишига ёрдам бераётгандай бўлишди.
Марат булар ким бўлди экан, нега автобусдан тушишдию, нега қайтиб чиқишди, деб ўйлаб турган эди, чўнтагига кимнингдир қўл солганини сезди. Шунда бояги икки кишининг кимлар эканини фаҳмлади. Орқасига ўгирилиб қараган эди, бояги икки барзангининг бири чўнтагига икки бармоғини тиқиб турган экан. Бугун олган стипендиясидан айрилишни истамаган Марат жаҳл билан чўнтагидан бегона қўлни олиб ташлади. Ҳаракатини сездириб қўйган ўғри эса ҳеч нарса бўлмагандай ёнида турибди. Марат аввалига барзангининг юзига мушт туширмоқчи, шовқин чиқариб, одамларнинг эътиборини унга қаратмоқчи бўлди. Лекин дарров шаштидан қайтди. Чунки, чўнтаккесарларнинг ҳаракатини ошкор қилганларнинг юзини устара ё ўткир пичоқ билан тилиб кетиши ҳақида кўп эшитган. Улар икки киши, бири ушлаб турса, иккинчиси пичоқлаб кетиши ҳам мумкин. Ўзи қўзғалишнинг иложи бўлмай турганида бундай ишни амалга ошириш икки барзанги учун қийин эмас. Нима қилишини билмай, ҳайрон бўлиб турганида автобус келгуси бекатга келиб тўхтади ва эшигини очди. Ўндан зиёд одам тушиб, салон анча бўшаб қолди.
Марат икки ўғридан нарироққа бориб турдида, уларни кузата бошлади. Энди пули жойидами, йўқми, текшириб кўрмоқчи бўлди. Одатда, пулини доимо ўнг чўнтагига солиб юргани учун, ўнг қўлини чўнтагига солди. Шу заҳоти юзи қизариб, юраги гурсиллаб уриб кетди. Буни ёнида турган икки қиз ҳам сезди. Ўғрининг қўли солинган чўнтак бўш эди. Қайта-қайта чўнтагига қўл солиб, Марат ғазаблана бошлади. Бугун олган стипендияси бугун йўқ. Умрида биринчи маротаба бундай тушкун ҳолатга тушди. Энди, йўлкира ҳам, бир ойлик нон-чой пули ҳам йўқ. Йиғлагудай бўлиб, ўғриларга қаради. Улар энди талаба қизларнинг чўнтакларини титкилаётган эди. Маратнинг кузатаётганини улар сезмади, шунинг учун бемалол бир-бири билан имлаб алоқа қилишарди. Уларнинг ораси уч қадам. Имо-ишора қилиб, аста-секин бир-бирига яқинлашиб боришарди. Марат учун вақт тўхтаб қолгандай бўлди. У энди пулларини қайтариб олиш режасини туза бошлади. Автобус ичида бу ишни бажариб бўлмаслигига кўзи етди. Чунки, бу ерда уларнинг учинчи шериги ҳам бор экан, у икки ўғрига имо-ишора билан нималарнидир уқтирарди. Ўғрилар озгина ичиб олишган. Автобус Талабалар шаҳарчасига келиб тўхтади, Маратнинг тушиб қоладиган бекати. У ўғрилар билан бирга кетаверсамми, деб ўйлади. Чўнтаккесарлардан тушган жойда «пулимни қайтариб беринглар», деб, сўрамоқчи ҳам бўлди. Лекин миясига ярқ этиб бир ўй келди. Ўзларига ўхшаб, ўғриларнинг чўнтагига қўл солиб кўрсамчи, деган фикрдан унинг юраги янада қаттиқроқ уриб кетди. Шу пайт унинг чўнтагига қўл солган ўғри талабалар билан бирга автобусдан тушиб, йўловчиларни зимдан кузата бошлади. Бу ўғрининг чўнтагини титкилаб кўриш, ўз пулларини қайтариб олиш учун жуда қулай фурсат эди, чунки шериклари тиқилинч автобусда ўз ишлари билан банд, унинг ёнида эса ҳеч ким йўқ. Марат автобусдан тушиб, дархол ҳалиги ўғрининг ёнида пайдо бўлди. Чўнтаккесар унга қиё ҳам боқмади, у автобусга чиқаётганларнинг ҳамёни катта-кичиклигини кузатаётган эди.
Марат уни секин туртиб, «ака, менинг пулларимни қайтариб беринг», деди.
– Тур нари, қанақа пул?
– Ака, чўнтагимдаги пулни олиб қўйдингизку, боя тиқилинчда қўлингизни чўнтагимдан чиқариб ташлаган мен эдим.
– Нари тур деяпман, мен сенинг пулларингни олганим йўқ.
– Ака, ҳеч кимга билдирмай берақолинг, мен ҳам ҳеч кимга айтмайман.
Ўғри билагидан ушлаб турган Маратни туртиб “Яхшиликча йўқол бу ердан, ҳеч қандай пул йўқ!», – деди.
Маратнинг ўғрига нисбатан ғазаби кучайди. Вулқон сингари тошиб, ўз кучини кўрсатди. Мактабда бокс машғулотларига қатнагани қўл келиб, бор кучи билан ўғрининг юзига мушт туширди. Кутилмаган зарбадан ўғри йиқилиб тушди, йиқилаётганда чўнтагидаги буюмлар, резина билан ўраб қўйилган бир ўрам пул, носвой, тароқ ва бошқалар отилиб кетди. Марат пулни олди-да, қочиб кетди. Кетаётиб, бекатда икки аёлнинг бир-бирига гапираётганини эшитди – «Ана, ўғри қочди, бир бечорани қон қақшатиб». Автобусдаги ва бекатда турган йўловчиларнинг олдида ўғри жабрдийда, Марат ўғри бўлиб қолди. Дарров оқимга қўшилиб кетди. Такси тўхтатиб, орқа ўриндиққа ўтирди ва нафасини ростлади. Икки бекат юриб, таксидан тушди ва одамларга қарай бошлади. Ўғриларга ўхшаган ҳеч кимни кўрмади ва чуқур нафас олиб, «хайрият» деб қўйди. Ўғрилардан қочиб қутулди, ўғирланган пулларини қайтариб олди.
Марат ўғридан олиб қўйган пулларини санаб кўрмоқчи бўлди. Лекин... Резина белбоғ ўтказилган пуллар уники эмас эди. У пулларини ҳеч нарсага ўрамай чўнтагига солиб қўйган эди. Пулни санаётиб, ўртасига келганида ҳажми сал каттароқ, ранги яшил пуллар ҳам бор эканини пайқаб қолди. Уларни чиқариб, алоҳида санаб кўрди. 500 АҚШ доллари экан. Сўнг, пулнинг қолганини санашга Маратнинг ҳафсаласи бўлмай қолди. Пулини чўнтагига солиб, «Буёғи энди нима бўлар экан?» деб хавотирлана бошлади. Хаёлан, пулларини чап чўнтагига солаётиб, бармоқлари қоғоз ўрамига тегди. «Бу чўнтагимда нима бор эди?», деб ҳайрон бўлиб, Марат қўлига теккан ўрамни чиқарди. Қараса,бугун олган стипендияси сўнг чўнтагида турган экан. «Қандай қилиб стипендиям ўнг чўнтагимдан чап чўнтагимга тушиб қолди», деб боши қотиб турганида полиция ходимини кўриб, сергак тортди ва тез-тез юриб, полиция бўлимига борди,бўлган воқеани полиция нозирига айтиб берди. Унинг сўзларидан уч ўғрининг фотороботи чизилиб, бозорлар ва бошқа одамлар гавжум жойларга илинди, кўп ўтмай, улар ушланди. Маратни туман ички ишлар бўлими раҳбари ҳузурига таклиф қилиб, полиция уч йилдан бери қўлга туширолмай келаётган гуруҳни ушлашга ёрдам бергани учун миннатдорчилик билдирди ва эсдалик совғасини топширди.
Шу воқеадан кейин, Марат қайси автобусга чиқмасин, йўловчиларни зимдан кузатадиган бўлди. Кузатавериб, чўнтаккесарларни бир кўришда таниб оладиган қобилияти намоён бўлди. Мақсади – ўқишни тугатиб, жиноят қидирув бўлимида ишлаш.