1 март – Шукрона куни доирасида вилоятимизда турли тадбирлар уюштирилди. Шунингдек, Астана шаҳрида ҚР Давлат котиби Гулшара Абдихалиқова иштирокида Қозоғистон халқи Ассамблеясининг “Минг ташаккур” номли тантанали тадбири ва  концерт  ўтди.

Концерт аввалида Қозоғистон халқи Ассамблеясининг ХХV сессиясида Давлатимиз раҳбари берган топшириққа асосан, ҚР Ахборот ва коммуникациялар вазирлиги тайёрлаган ҚХАнинг элимиздаги турли миллат ва элатларни бирлаштирувчи мультимедия портали таништирилди. Ушбу электрон тизим келгусида Жануб ва Шимол, Ғарб ва Шарқ орасидаги алоқаларни мустаҳкамлайди.

Порталнинг онлайн кўрсатуви имкониятларини намойиш қилиш мақсадида таништирув давомида Ғарбий Қозоғистон ва Жанубий Қозоғистон вилоятлари иштирокида видеоконференция ўтказилди.

Видеоанжуманга Жанубий Қозоғистон вилояти ҳокимлиги мажлис залидан қўшилди. Унда вилоят ҳокимининг ўринбосари Уласбек Садибеков, ассамблея аъзолари, минтақамиздаги этномаданият бирлашмалари раислари ҳамда вакиллари иштирок этишди.

Жанубий Қозоғистондан вилоят Қозоғистон халқи Ассамблеяси раисининг ўринбосари, корейс этномаданият бирлашмасининг раиси Роза Пак сўзга чиқиб, тилакларини билдирди.

Видеоконференциядан сўнг вилоят ҳокимининг ўринбосари У. Садибеков ва этномаданият бирлашмалари вакиллари иштирокида ушбу санага бағишланган давра суҳбати ўтди. 

– Ҳозирги кун талабларига жавоб берадиган мультимедиявий портал – “Рақамли Қозоғистон” дастурининг натижаси. Чунки, энди вилоятлар ўртасида ўзаро алоқалар кучаяди, – деди вилоят ҳокими ўринбосари У. Садибеков. – Бу ҳам яхши қўшничиликнинг ёрқин кўринишларидан биридир.