Шимкент шаҳрининг Сайрам даҳасидаги Шуҳрат Аҳмедов раҳбарлик қилаётган 10-сонли коллежда Қозоғистон Республикаси Президенти Н. Назарбаевнинг “Келажакка йўлланма: маънавий янгиланиш” дастурий мақоласида белгиланган вазифалар доирасида “Тарбия ва билим”, “Маънавий мерос”, “Ота макон”,“Ахборот тўлқини” йўналишлари асосида турли тадбирлар ўтказиш режаланган.  Жумладан, ўқув йили мобайнида “Абайнинг “Насиҳатлар”и, “Диёримизнинг атоқли инсонлари”, “Маънавий мерос – янгиланиш ўзаги ”, “Тил – маънавий бойлик”, “Туғилган ерга таьзим!”, “Касбим – фахрим”, “Китоб – билим булоғи” мавзуларида синф соатлари, очиқ дарслар, учрашув, анжуман, экскурсия, танлов ва хайрия концертлари ўтказилди.     

Коллеж талабаларининг Жанубий  Қозоғистон вилоят таълим бошқармаси ташаббуси билан уюштирилган анъанавий “Өнер фестивалі – 2018”даги иштироки алоҳида эътиборга моликдир. Унда қатнашган Ҳ. Исаметовнинг “Менинг коллежим” қўшиғи, саҳна кўринишлари, қўшиқ ва рақслар, доира оҳанглари барчанинг олқишига сазовор бўлди.

Фестиваль якунида коллеж директори Ш. Аҳмедов билан биргаликда саҳнага кўтарилган вилоят таълим бошқармаси қўшимча таълимни ривожлантириш маркази вакиллари  Ғ. Ақилбеков ва А. Кўшеновлар санъатсевар талабаларга ҳамда концерт дастурини тайёрлаган устозларга миннатдорлик билдиришди.

Шуни алоҳида таъкидлаш жоизки, коллеж талабалари вилоят миқёсида ўтказилаётган танловларда пешқадамликни қўлдан бермай келишмоқда.