Пойтахтнинг 20 йиллигига туҳфа акцияси доирасида Шимкент ҳайвонот боғининг “Африка” зоологиявий ҳудуди фойдаланишга топширилди. Тантанали тадбирда вилоят ҳокими Жансейит Туймебаев шаҳарликларни ушбу янги маскан тақдимоти билан қутлаб, ҳудудни оралаб кўрди.

Минтақа раҳбари янги манзилгоҳ миллионли шаҳар учун улкан совға эканлигини таъкидлади.

– Элимизда жами 3та ҳайвонот боғи мавжуд бўлса, шуларнинг бири вилоятимизда эканлиги айни муддао. Шимкент ҳайвонот боғининг мақсади – кам учрайдиган ҳамда йўқолиб бораётган жониворларни сақлаб, уларни кўпайтириш. Бугунги кунда ҳайвонот боғида 249 хил 2565та жонивор бор. Ҳозир бу ерда қайта қуриш ишлари бошланган. Боғнинг ўзгачалиги – таъмирлашдан сўнг “Африка” қисмидаги павильонлар очиқ осмон остига мослаштирилган. Мана, энди ушбу ҳудуд очилгач, томошабинлар сони янада ортиши табиий, – деди Жансейит Қансейитули.

Шунингдек, минтақа раҳбари Астананинг 20 йиллик шодиёнасига Шимкент шаҳри ҳайвонот боғидан 20 хил жониворларни Астана ҳайвонот боғига тортиқ этилишини маълум қилди. Улар – арслон, Амур йўлбарси, айиқ ва бошқа ҳайвонлар.

Тадбирда вилоят, шаҳар маслаҳати депутатлари, фахрийлар, шаҳар туманлари ҳокимлари ҳамда ОАВ вакиллари иштирок этишди.