Шимкентда “Мардлик” музейи қўшимча биносининг очилиш маросими ўтди. Тадбир аввалида вилоят ҳокими Жансейит Туймебаев ва минтақа зиёли фахрийлари ҳамда “Ғалаба” хиёбонидаги Совет Иттифоқи қаҳрамони, генерал Собир Раҳимов ҳайкали пойига гулчамбарлар қўйишди. Тадбирда вилоят ҳокими фуқароларни янги бинонинг очилиш муносабати билан қутлади.

– Ботирларимизнинг, ота-боболаримизнниг Улуғ Ватан уруши йилларидаги мардлиги ва жасорати, фронт ортидаги меҳнатлари, афғон уруши фахрийларининг қаҳрамонликларини тарғиб қилишда бу музейнинг аҳамияти беқиёс. Ёшларни ватанпарварлик руҳида тарбиялашда ушбу марказнинг ҳам ўз ҳиссаси бор, – деди Жансейит Қансейитули.

“Мардлик” музейи 2012 йили декабрь ойида очилиб, 2013 йил 19 июнда ЖҚВ тарихий-ўлкашунослик музейининг “Мардлик” филиали бўлиб расмийлаштирилган. Илгари бинонинг майдони 209,6 кв.м. бўлса, вилоят ҳокимининг ташаббуси билан қўшимча қурилиш ишлари олиб борилиб, 285 кв.метрда янги иншоот барпо этилди. Янгидан очилган икки қаватли бинода 2та экспозиция зали, 50 ўринли мажлис зали, экспонатларни сақлайдиган ва ходимлар фаолияти учун хоналар мавжуд. Бу музейда уруш фахрийларининг жасоратларини тарғиб қилишда зиёлилар вакиллари билан учрашувлар ва бошқа тарихий тадбирлар ўтказилади.